ཚིག འབྲུག་ལྷ་རྒྱལ།
དབྱངས།འཇམ་དབྱངས་བསྟན་འཛིན།
ལེན་མཁན།བསོད་ནམས་ཆོས་སྒྲོན
གླུ་འཇོག་མཁན་སྙན་བཟང་རིན་ཆེན།
གངས་དཀར་ཏི་སེ་དབུས་གཙང་ཡུལ་དུ་བརྗིད།
རྨ་རྒྱལ་སྦོམ་ར་མདོ་སྨད་ཡུལ་དུ་བརྟན།
འགྱུར་མེད་དཔལ་གྱི་རྔམས་ཟིལ་ཆེ་བ་འདི།
གངས་ཅན་བོད་མིའི་བློ་སྤོབས་མཐོ་བའི་རྟགས།
འགྱུར་མེད་དཔལ་གྱི་རྔམས་ཟིལ་ཆེ་བ་འདི། །
གངས་ཅན་བོད་མིའི་བློ་སྤོབས་མཐོ་བའི་རྟགས།
མ་ཕམ་གཡུ་མཚོ་དབུས་གཙང་ཡུལ་དུ་འཁྱིལ། །
ཁྲི་ཤོར་རྒྱལ་མོ་མདོ་སྨད་ཡུལ་དུ་བལྟམས།
དྭངས་གཙང་ཤེལ་གྱི་ཁ་མདོག་གསལ་བ་འདི།
གངས་ཅན་བོད་མིའི་ཡིད་སེམས་དྲང་བའི་རྟགས།
དྭངས་གཙང་ཤེལ་གྱི་ཁ་མདོག་གསལ་བ་འདི། །
གངས་ཅན་བོད་མིའི་ཡིད་སེམས་དྲང་བའི་རྟགས།
ཡར་ཀླུང་གཙང་བོ་དབུས་གཙང་ཡུལ་དུ་བཞུར། །
རྨ་ཀླུང་སྒེག་མོ་མདོ་སྨད་ཡུལ་དུ་རྒྱུ།
ཆུ་རྒྱུན་ཆེན་མོ་རྒྱ་མཚོར་འབབ་པ་འདི།
གངས་ཅན་བོད་མིའི་ཕུགས་འདུན་རིང་བའི་རྟགས།
ཆུ་རྒྱུན་ཆེན་མོ་རྒྱ་མཚོར་འབབ་པ་འདི། །
གངས་ཅན་བོད་མིའི་ཕུགས་འདུན་རིང་བའི་རྟགས།
གངས་ཅན་བོད་མིའི་ཕུགས་འདུན་རིང་བའི་རྟགས།
